باتىس قازاقستان وبلىسى توتەنشە جاعدايلار دەپارتامەنتىنە وقيعا تۋرالى مالىمەت 4 قاڭتار ساعات 02:07-دە تۇسكەن. بەلگىلى بولعانداي, ورال قالاسى سىرىم داتوۆ كوشەسى 52 مەكەنجايىنداعى «RIZYQ» ءدامحاناسىندا ءورت شىققان. تجد قىزمەتكەرلەرى وقيعا ورنىنا ساعات 02:17-دە جەتكەن.
«ەكى قاباتتى «RIZYQ» ءدامحاناسىنىڭ عيماراتىندا الدىن الا بولجام بويىنشا گاز-اۋا قوسپاسىنىڭ جارىلىسى بولعان. عيماراتتىڭ 110 شارشى مەتر اۋماعى قيراپ, 25 شارشى مەتر اۋماعىندا ءورت شىققان. ءورت ساعات 02:40-تا ءسوندىرىلدى. وقيعا ورنىندا №1 ءموسب, № 2 ءموسب, № 8 ءوسب, № 5 ءوسب, ءورت ءسوندىرۋدىڭ كەزەكشى قىزمەتى, جەكە قۇرامنان 39 ادام جانە 13 تەحنيكا بىرلىگى, جەدەل قۇتقارۋ جاساعى قۇتقارۋشىلارىنان 8 ادام جانە 2 تەحنيكا جۇمىلدىرىلدى. جەدەل مەديتسينالىق جاردەم بريگاداسىنان 18 ادام, 6 بىرلىك تەحنيكا, پوليتسيا دەپارتامەنتىنەن 28 ادام, 7 بىرلىك تەحنيكا جۇمىس ىستەدى», دەلىنگەن جەرگىلىكتى تجد مالىمەتىندە.
سونداي-اق وقيعا ورنىنا بقو تجد باسشىلىعى, ء«وس جانە اقجق» مم, وبلىس اكىمدىگى جانە قر تجم ونەركاسىپتىك قاۋىپسىزدىك كوميتەتىنىڭ بقو بويىنشا دەپارتامەنتى وكىلدەرى بارعان. قازىر تجد جانە وبلىس اكىمدىگىنىڭ قىزمەتكەرلەرى قيراعان ۇيىندىلەردى تازارتىپ جاتىر.
زارداپ شەككەندەرگە شۇعىل پسيحولوگيالىق كومەك كورسەتۋ ءۇشىن بقو تجد شتابىندا 8 (7112) 55-40-88 ءنومىرى بويىنشا جەدەل جەلى جۇمىس ىستەپ تۇر.
